Болат Назарбаевқа тиесілі нысанды жекешелендіру жарамсыз деп танылды

Сот Алматыдағы «Барыс-4» көтерме сауда базарын жекешелендіруді жарамсыз деп таныды, деп хабарлайды Bugin.kz порталы KazТag агенттігіне сілтеме жасап.  

«Сот талап арызды қанағаттандыру және «Найза-БН» ЖШС-нің («Барыс-4» көтерме сауда базары – ҚазТАГ) жарғылық капиталындағы мемлекеттік үлесті сату шартын жарамсыз деп тану туралы шешім шығарды», - деп хабарлайды Алматы қаласы әкімдігінің баспасөз қызметі.

Бұл туралы қалалық сот хабарлады. 3 қазанда жарияланған сот шешімі заңды күшіне енген жоқ. Алматы прокуратурасы жекешелендіру келісімін жарамсыз деп тану туралы сотқа шағым түсірді.

«Уәкілетті мемлекеттік органның заңды тұлғаның жарғылық капиталындағы мемлекеттің үлесін жекешелендіру кезінде заңсыз жеңілдіктер мен артықшылықтар беруі прокурордың талап қоюына негіз болды. Сот талқылауы барысында талап арызда келтірілген дәлелдер расталды. Уәкілетті органның өкілі нысанды жекешелендіру мемлекет мүддесіне нұқсан келтіре отырып, аз шығынмен жүргізілгенімен келісіп, талаптарды мойындады», - деп түсіндірді сот.

Мәмілені жарамсыз деп тану үшін «Мемлекеттік мүлік туралы» Заңның 112-бабы 1-тармағының 3) тармақшасын бұзу, атап айтқанда сатып алушыға заңсыз жеңілдіктер мен артықшылықтар беру, объектінің құнын кем бағаламау негіз болды.  

«Сотта мемлекеттік мүлікті арзандатылған бағамен сату фактілері расталды», - деп түсіндірді сот.

Айта кетейік, Қаржы министрлігінің мәліметінше, «Найза-БН» ЖШС құрылтайшыларының бірі Қазақстанның экс-президенті Нұрсұлтан Назарбаевтың інісі Болат Назарбаев.